संविधानको रक्षाका लागि चितवनमा एमालेको जागरण सभा

चितवन: सुदृढ गणतन्त्र र संविधानको रक्षाका लागि नेकपा (एमाले) चितवनले जिल्लामा जागरण सभा गरेको छ ।
‘प्रतिगामी चलखेललाई परास्त गरौं । लोकतान्त्रिक गणतन्त्रलाई सुदृढ गरौं’ भन्ने मुल नाराका साथ भरतपुरको गेष्ट हाउस चौरबाट र्याली सुरु गरी अस्पताल रोड हुँदै चौबीसकोठीमा पुगेर जागरण सभा गरिएको थियो ।
र्यालीमा गणतन्त्र जिन्दावाद, प्रतिगमन मुर्दावाद, हिँसा, हत्या र लुटपाट मुर्दावाद, जन्मसिद्ध श्रेष्ठता अस्वीकार गरौं, नेकपा (एमाले) जिन्दावाद, दाश र रैती बन्न मञ्जुर छैन, हत्यारालाई कारबाही गर, शान्ति सुव्यवस्था कायम गर, सामाजिक अराजकता मुर्दावाद, जनताको बहुदलीय जनवाद जिन्दावाद लगायतका नारा लगाइएको थियो ।
सभामा नेकपा एमालेका पोलिटब्युरो सदस्य एवम् चितवन जिल्ला इन्चार्ज देवी ज्ञवालीले राजा आए भने देशमा के हुन्छ भन्ने कुरा काठमाडौंको तिनकुनेमा राजावादीले गरेको हर्कतबाट प्रष्ट भइसकेको बताउनुभयो । ‘निजी घरमा आगजनी गर्दा रहेछन्, पत्रकारलाई जलाउँदा रहेछन्, सञ्चारमाध्यममा तोडफोड गर्दा रहेछन्, राजनीतिक दलका कार्यालयमा आगजनी र तोफोड गर्दा रहेछन्, राजतन्त्रको चरित्र के हो भनेर उनीहरुले देखाइसकेका छन् ।’ अब यस्तो राजतन्त्र पुनः फर्काउँछु भन्नेहरु पागलहरुको जमात हो भनेर सबैले बुझ्‌नुपर्ने उहाँको भनाई छ ।
हिजो राजतन्त्र हुँदा ५४ प्रतिशत नागरिक गरिबीको रेखा मुनि रहेको बताउँदै उनले अहिले त्यो तथ्यांक १५ प्रतिशतमा झरिसकेको बताउनुभयो । राजतन्त्रका पालामा बिजुली ८ प्रतिशतले पनि बाल्न पाउँथेनन् भन्दै नेता ज्ञवालीले अहिले ९५ प्रतिशतको घरमा बिजुली पुगेको बताउनुभयो । । ३७ प्रतिशत साक्षरता दरबाट अहिले ७६ प्रतिशत साक्षरता दर पुगेको उनले बताए । राजाको पालामा प्रतिव्यक्ति आय १८५ डलर रहेको बताउँदै उनले अहिले १४१० डलर पुगेको बताउनुभयो । राजतन्त्रका बेलामा ७ हजार किलोमिटर पनि बाटो पिच नभएको बताउँदै उनले अहिले एक लाख ३१ हजार किलोमिटर बाटो पिच भएको बताउनुभयो ।
एमाले केन्द्रीय सदस्य एवम् बागमती प्रदेश एमाले संसदीय दलका नेता जेएन थपलियाले नेपाली जनताहरुले अब निरंकुशता नचाहने बताउनुभयो । उनले जब जब नेकपा (एमाले) ले देशमा नेतृत्व गरी विकासको लहर ल्याउन खोज्छ तब तब देशमा यो वा त्यो बाहनामा विकासको लहरलाई रोक्न असन्तुष्टि पैदा गराउने तत्वहरु सक्रिय हुने गरेको बताउनुभयो । अहिले राजावादीहरुले यसो गरिरहेको भनाइ छ ।
एमाले चितवनका अध्यक्ष कमलराज पाठकले जनताको ठूलो बलिदानीपूर्ण आन्दोलनबाट यो व्यवस्था ल्याइएको बताउँदै यसलाई कसैले त्यति सहजै फर्काउने सपना नदेख्न चेतावनी दिनुभयो ।